有人話，金錢糾紛，報警都冇用；亦有人話其實會犯欺詐罪，法庭見！講到收數，合法途徑有啲咩？小額錢債又有冇用？定係要搵收數公司呢？無論你係公司定個人，我们整合咗啲法律知識，希望可以解答大家嘅疑問。

小額錢債時效：收數/追數只有6年大限

如果雙方有發票、合約、借據等文件，唔找數就係違約，根據香港法律第347章《時效條例》，違約當日起就有「訴訟因由」 (Cause of action)，而「訴訟因由」一旦過咗6年，原告人就冇辦法提告。

欠債HK$75,000或以下：下載小額錢債表格

你只需要喺辦公時間內前往位於長沙灣通州街501號號西九龍法院大樓B座嘅小額錢債審裁處，填寫表格1同表格2，提交申索書時按申索額只需要交HK$20 - HK$120就可以。然後你會收到法庭嘅出席聆訊通知書，只需要依照日期準時出席聆訊就可以。

申索額 HK$5,000或以下：HK$20

申索額 HK$5,001 - HK$25,000：HK$40

申索額 HK$25,001 - HK$50,000：HK$70

申索額 HK$50,001 - HK$75,000：HK$120

如果欠債HK$75,000 - HK$100萬就要到區域法院，而欠債HK$100萬以上就要到高等法院。

下載連結：通用表格(表格1)、申索書(表格2)

通用表格（表格1）：https://www.judiciary.hk/zh/court_services_facilities/sc_form01.html

申索書：https://www.judiciary.hk/doc/zh/court_services_facilities/sc/juds2.pdf

入稟狀送到欠債人地址後，視乎欠債人嘅舉動同案情嘅爭議性，可能可以申請簡易判決 (Summary Judgment)。當債主拎得勝訴令後，欠債人如果依然唔願意找數，呢個時候作為債主作為原訴人可以採取後續嘅法律行動，例如將欠債人嘅資產出售用作找數。如果唔知道欠債人有啲咩資產，可先作出口頭盤問 (Oral Examination) 將欠債人傳召上法庭，對手頭上嘅資產作宣誓。

小額錢債勝訴後可作出嘅部份法律行動

押債務人財產令狀 (Writ of Fieri Facias)：委任執達吏 (Bailiff) 去收返啲物件或動產，然後賣咗佢嚟還債，呢個通常喺欠債人有個人資產嗰陣用

第三者債務人嘅法律程序 (Garnishee procedure)：如果欠債人喺銀行有存款，第三者債務人嘅法律程序可以直接拎欠債人嘅銀行存款向債主還錢

押記令 (Charging order)、賣樓令 (Order for sale)：欠債人有土地或物業，當債主攞到押記令後，欠債人嘅物業會變成有利於債權人一方嘅衡平法押記，跟住就會申請將啲物業賣咗嚟還債

禁止令 (Prohibition order)：法庭頒令禁止欠債人離開香港

停止令 (Stop notice) 及限制令 (Restraining order)：防止欠債人將用嚟還錢嘅資產轉讓，或做證券交易。有啲情況下，債主可以申請強制令 (Injunction)，防止欠債人將資產調離香港，或用其他方法處理資產，嚟逃避債務

破產或清盤令 (Bankruptcy or Winding up)：將欠債人資產變賣套現，攞返嚟嘅錢會分俾各個債主，嚟還清全部或部分債務。喺破產令生效期間，破產人嘅部分收入都會用嚟還債

以上嘅執行成本基本上會超過條數本身嘅金額，執行之後亦唔代表會收得返啲錢，所以當債主拎得勝訴令後，欠債人如果依然唔願意找數，大部份都會放棄繼續追討，或搵收數公司幫手。

係咪一定要拎到勝訴令，收數公司先可以行動？

唔一定。無論自己定搵收數公司追數，呢個行為本身就唔洗拎法庭判令。需要注意嘅係，收數公司嘅行為必須合法，唔可以有恐嚇、勒索、傷人、刑事毀壞等行為。

上門收數合唔合法？

合法。一般收數公司上門收數都會拎住張欠單或法庭判令，去欠債人公司或屋企收數，就算欠債人報警，警察都只會到場了解一下情況，留低報案編號，然後就走，只要冇觸犯刑事，警察係唔會干涉金錢糾紛。